محکمہ اسکولز نے کاغذی کارروائی کم کرنے اور اساتذہ کے ترقیاتی عمل کو ڈیجیٹل بنانے کا فیصلہ کرلیا ہے۔ اس سلسلے میں گریڈ 14 کے پرائمری ٹیچرز کی سینیارٹی لسٹ ویب سائٹ پر آن لائن اپ لوڈ کی جائے گی۔
محکمہ اسکولز نے سندھ کے تمام ڈویژنز کو سینیارٹی لسٹ 15 روز کے اندر ویب سائٹ پر اپ لوڈ کرنے کی ہدایت کردی ہے۔ اس حوالے سے کراچی، حیدرآباد سمیت سندھ کے 6 ڈویژنز کو باقاعدہ خط بھی ارسال کردیا گیا ہے۔
محکمہ اسکولز کے مطابق سینیارٹی لسٹ آن لائن دستیاب ہونے کے بعد اساتذہ کو اگلے گریڈ میں ترقی دینے کا عمل شروع کیا جائے گا۔ اس اقدام کا مقصد کاغذی کارروائی کم کرنے کے ساتھ ترقیوں کے عمل میں شفافیت اور آسانی پیدا کرنا ہے۔
حکام نے پرائمری ٹیچرز کو گریڈ 16 میں ترقی دینے کا فیصلہ بھی کیا ہے، جس کے تحت اہل اساتذہ کو گریڈ 16 میں ہائی اسکول ٹیچر کے عہدے پر ترقی دی جائے گی۔
ترقیوں کے عمل کے دوران اساتذہ کو اپنے اعتراضات بھی آن لائن جمع کرانے کی سہولت فراہم کی جائے گی، جبکہ موصول ہونے والے اعتراضات کے ازالے کا عمل بھی آن لائن مکمل کیا جائے گا۔
محکمہ اسکولز کے اس اقدام سے اساتذہ کو سینیارٹی، ترقی اور اعتراضات سے متعلق معاملات کے لیے غیر ضروری دفتری کارروائی اور کاغذی مراحل سے نجات ملنے کی توقع ہے۔
