وزیراعلیٰ پنجاب مریم نواز نے سی ایم الیکٹرک بائیک اسکیم کے تحت طلبہ سے ڈاؤن پیمنٹ وصول نہ کرنے کی ہدایت کردی ہے، جبکہ طلبہ کے لیے ماہانہ 3 ہزار روپے قسط کی تجویز پر بھی اتفاق کیا گیا ہے۔
مریم نواز کی زیر صدارت ہونے والے اجلاس میں الیکٹرک بائیک اسکیم کے حوالے سے اہم فیصلے کیے گئے۔ اجلاس میں اسکیم کا دائرہ کار طلبہ کے علاوہ سرکاری ملازمین، عام شہریوں اور ڈیلیوری بوائز تک بڑھانے کی منظوری بھی دی گئی۔
اجلاس میں بتایا گیا کہ حکومت پنجاب ای بائیک پر عائد انٹرسٹ اور انشورنس کی رقم خود ادا کرے گی۔ طلبہ کو الیکٹرک بائیک کے ساتھ ہیلمٹ اور سیفٹی راڈ بھی مفت فراہم کیا جائے گا۔
طلبہ کو الیکٹرک بائیک چلانے کے حوالے سے دو روزہ مفت تربیت بھی دی جائے گی تاکہ وہ محفوظ طریقے سے موٹر سائیکل استعمال کرسکیں۔
وزیراعلیٰ پنجاب نے طلبہ کو ای بائیکس کی فراہمی کا عمل تیز کرنے کی ہدایت کرتے ہوئے کہا کہ انہیں 6 ہفتوں کے اندر بائیکس فراہم کرنے کے لیے ضروری اقدامات کیے جائیں۔
مریم نواز نے اسی ہفتے ای بائیک پورٹل کھولنے کا حکم بھی دیا ہے تاکہ طلبہ اور دیگر اہل افراد اسکیم سے فائدہ اٹھانے کے لیے درخواست دے سکیں۔
نئی سہولت کے تحت ڈاؤن پیمنٹ ختم کرنے اور ماہانہ آسان اقساط مقرر کرنے سے طلبہ کے لیے الیکٹرک بائیک کا حصول مزید آسان ہونے کی توقع ہے۔
