امریکا کی جانب سے ایران پر مزید سخت پابندیوں کے متوقع اعلان سے قبل عالمی منڈی میں تیل کی قیمتوں میں ایک ڈالر سے زائد کمی ریکارڈ کی گئی۔
سرمایہ کاروں نے گزشتہ ہفتے قیمتوں میں ہونے والے نمایاں اضافے کے بعد منافع حاصل کرنے کو ترجیح دی۔
امریکی وزیر خزانہ اسکاٹ بیسنٹ نے ایران کے خلاف سخت ترین پابندیاں عائد کرنے کا عندیہ دیا ہے، جبکہ امریکی صدر ڈونلڈ ٹرمپ نے ایران کے ساتھ تجارت کرنے والے ممالک کے خلاف بھی پابندیاں عائد کرنے کی دھمکی دی ہے۔
عالمی مارکیٹ میں برینٹ خام تیل کی قیمت ایک ڈالر 22 سینٹ کمی کے بعد 93.17 ڈالر فی بیرل ہوگئی، جو 1.29 فیصد کمی بنتی ہے۔
امریکی ویسٹ ٹیکساس انٹرمیڈیٹ خام تیل کی قیمت بھی ایک ڈالر 20 سینٹ کم ہوکر 85.86 ڈالر فی بیرل پر آگئی، جس میں 1.38 فیصد کمی ریکارڈ کی گئی۔
گزشتہ ہفتے تیل کی قیمتوں میں مسلسل دوسرے ہفتے اضافہ ہوا تھا۔ برینٹ اور ڈبلیو ٹی آئی دونوں کی قیمتوں میں ہفتہ وار بنیادوں پر 5 فیصد سے زیادہ اضافہ ریکارڈ کیا گیا تھا، جس کے بعد سرمایہ کاروں کی جانب سے منافع حاصل کرنے سے قیمتوں پر دباؤ آیا۔
