امریکی بحری جہاز یو ایس ایس ابراہم لنکن کی 286 دن پر مشتمل طویل ترین تعیناتی اور ایران کے خلاف جنگی مشنز کے بعد زنگ آلود حالت کی تصاویر سامنے آنے پر دفاعی ماہرین میں شدید تشویش پھیل گئی۔
امریکی بحری فوج کا تقریباً گیارہ سو فٹ طویل طیارہ بردار جہاز یو ایس ایس ابراہم لنکن مسلسل 286 دن سمندر میں گزارنے کے بعد جب تھائی لینڈ کی لاپ چابانگ بندرگاہ پر پہنچا تو اس کی زنگ آلود حالت نے سب کو حیران کر دیا۔
جہاز کے اگلے حصے سے لے کر پچھلے حصے تک اور پانی کی سطح کے ساتھ زنگ کی موٹی تہیں واضح طور پر دیکھی جا سکتی ہیں۔
گزشتہ سال نومبر میں سین ڈیگو کی بندرگاہ سے روانہ ہونے والے اس جنگی جہاز نے مشرقِ وسطیٰ میں ایران کے خلاف مہینوں تک جنگی کارروائیوں اور سمندری ناکہ بندی میں حصّہ لیا۔
یہ بھی پڑھیں : امریکی فورسز نے آبنائے ہرمز میں 87 تجارتی بحری جہازوں کو رخ موڑنے پر مجبور کیا، سینٹ کام
سابق امریکی نیوی کیپٹن کارل شسٹر کا کہنا ہے کہ 60 دن یا اس سے زیادہ عرصے تک مسلسل سمندر میں رہنے والے جہازوں پر زنگ لگنا معمول کی بات ہے، لیکن 286 دن کی طویل ترین تعیناتی نے اس کی حالت شدید خراب کر دی ہے۔
جنگی آپریشنز کے دوران سمندر کے بیچ جہاز کی مرمت یا زنگ کو صاف کرنا ممکن نہیں ہوتا، کیونکہ اس کے لیے جہاز کو ایک جگہ ساکت کھڑا کرنا پڑتا ہے۔
کارل شسٹر کے مطابق جہاز کی واٹر لائن سے زنگ ختم کرنے، اس پر لوہے کی حفاظتی کوٹنگ کرنے اور پھر نیوی گری رنگ کے دوہرے پینٹ کی تہیں چڑھانے کے لیے کم از کم 30 دن کی مسلسل محنت درکار ہوتی ہے۔
امریکی صدر ڈونلڈ ٹرمپ نے بحری جہازوں کی زنگ آلود حالت اور طویل تعیناتی پر پیدا ہونے والے تشویشناک خدشات کو رد کرتے ہوئے کہا کہ ابراہم لنکن کی تعیناتی کی مدت ہرگز زیادہ نہیں تھی۔
تاہم بحریہ کے اعلیٰ حکام کا کہنا ہے کہ صدر ٹرمپ نجی ملاقاتوں اور رات گئے فون کالز پر جنگی جہازوں کی زنگ آلود حالت پر شدید برہمی کا اظہار کرتے رہے ہیں اور انہوں نے دیکھ بھال کی یارڈز کو فوری طور پر جہازوں کو زنگ سے پاک کرنے کے سخت احکامات جاری کیے تھے۔
زنگ کی وجہ سے لوہے کی ساخت اور ڈیک کمزور ہو جاتے ہیں، جس سے بحری جہاز کے ڈھانچے کو شدید نقصان پہنچنے کا خطرہ رہتا ہے۔
