آسٹریلیا نے آبنائے ہرمز میں تجارتی جہازوں کی آمدورفت پر ایرانی پابندیوں کو ناقابل قبول قرار دیتے ہوئے آبی گزرگاہ کو فوری طور پر تمام جہازوں کے لیے کھولنے کا مطالبہ کردیا۔
آسٹریلیا کے نائب وزیر اعظم اور وزیر دفاع رچرڈ مارلس نے ایران سے مطالبہ کیا ہے کہ وہ آبنائے ہرمز کو عالمی تجارتی جہاز رانی کے لیے فوری طور پر کھول دے۔
انہوں نے کہا کہ ایران دنیا کی اس اہم ترین آبی گزرگاہ سے جہازوں کی گزرگاہوں کو محدود کر رہا ہے، جو کہ عالمی قوانین کی کھلی خلاف ورزی ہے۔
یہ بھی پڑھیں : سلامتی کونسل امریکی جنگی جرائم کی فوری مذمت کرے، ایرانی سفیر کا خط
واشنگٹن ڈی سی سے اے بی سی نیوز سے بات کرتے ہوئے آسٹریلوی نائب وزیر اعظم نے کہا کہ اس وقت سب سے بڑی ضرورت یہ ہے کہ آبنائے ہرمز کو ہر قسم کے سمندری ٹریفک کے لیے کھولا جائے۔
رچرڈ مارلس نے دعویٰ کیا کہ ایران کے یہ اقدامات اقوام متحدہ کے سمندری قوانین سے متعلق معاہدوں اور بین الاقوامی سمندروں میں آزادانہ نقل و حرکت کے بنیادی اصولوں کے بلکل خلاف ہیں۔
انہوں نے کہا کہ ہم مشرق وسطیٰ میں جاری شدید کشیدگی اور جنگ میں کمی دیکھنا چاہتے ہیں، لیکن اس کے ساتھ ساتھ یہ بھی ضروری ہے کہ آبنائے ہرمز کو بحال کیا جائے تاکہ دنیا بھر میں ایندھن اور تیل کی سپلائی چین دوبارہ معمول پر آ سکے۔
آسٹریلوی وزیر دفاع نے مزید کہا کہ ایران اس وقت قصداً آبنائے ہرمز کے ذریعے بحری جہاز رانی کو محدود کرنے کی کوشش کر رہا ہے، جو کہ آسٹریلیا اور عالمی برادری کے لیے نا قابل قبول ہے۔
