امریکی وزیر خزانہ کا کہنا ہے کہ امریکہ کی سخت معاشی پابندیوں کے باعث ایران شدید مالی نقصان کا شکار ہے، تہران کو مذاکرات پر آمادہ کرنا ان اقدامات کا بنیادی مقصد ہے۔
امریکی وزیر خزانہ اسکاٹ بیسنٹ نے جی 20 اجلاس کے موقع پر ذرائع ابلاغ سے گفتگو کرتے ہوئے دعویٰ کیا ہے کہ تہران کے خلاف عائد کی جانے والی امریکی پابندیاں اپنے اہداف حاصل کر رہی ہیں اور اس سے ایران کو شدید معاشی نقصان پہنچ رہا ہے۔
یہ بھی پڑھیں : امریکہ آبنائے ہرمز کو اپنا علاقہ بنانے کا خواب دیکھنا چھوڑ دے، ترجمان ایرانی فوج
انہوں نے مؤقف اختیار کیا کہ ایران اس وقت جس قسم کی عسکری کارروائیوں اور سخت ردعمل کا مظاہرہ کر رہا ہے، وہ دراصل اس پر پڑنے والے شدید معاشی دباؤ کی نشاندہی کرتا ہے۔
اسکاٹ بیسنٹ کا مزید کہنا تھا کہ ایران پر اقتصادی اور مالیاتی پابندیاں برقرار رکھنے کا بنیادی مقصد تہران پر اتنا دباؤ بنانا ہے کہ وہ مذاکرات کی میز پر آنے کے لیے آمادہ ہو جائے۔
